ଓଡିଆନ୍ ନ୍ୟୁଜ

145

ଭୁବନେଶ୍ୱର: ଆଇଏଏସ୍‌ ଓ ଆଇପିଏସ୍ ଲଢ଼େଇ, କାହାମୁଣ୍ଡରେ କଳସ ?

Team Odian News |

ଭୁବନେଶ୍ୱର:  ଆଇଏଏସ୍‌ ଓ ଆଇପିଏସ୍ ଲଢ଼େଇ, କାହାମୁଣ୍ଡରେ କଳସ  ?
ଭୁବନେଶ୍ୱର,୩୧/୩( ଓଡ଼ିଆନ୍‍ ନ୍ୟୁଜ୍‍):  ଏପ୍ରିଲ ୨୩ ତାରିଖରେ ତୃତୀୟ ପର‌୍ୟ୍ୟାୟ ନିର୍ବାଚନରେ  ସ୍ମାର୍ଟସିଟି ଭୁବନେଶ୍ୱରରେ ପୂର୍ବତନ ଆଇଏଏସ୍‌ ଓ ଆଇପିଏସ୍ ଲଢ଼େଇ। ଭୁବନେଶ୍ୱର ଲୋକସଭା ଆସନରେ ବିଜେପି ପ୍ରାର୍ଥୀ ଅପରାଜିତା ଷଡ଼ଙ୍ଗୀ ଓ ବିଜେଡିରୁ ଅରୂପ ପଟ୍ଟନାୟକ ନିର୍ବାଚନ ମଇଦାନରେ ରହିଛନ୍ତି  । 
ଭୁବନେଶ୍ୱର ଲୋକସଭା ଆସନରେ ବିଜେପି ପ୍ରାର୍ଥୀ ହୋଇଛନ୍ତି ଆଇଏଏସ୍‌ ଚାକିରି ଛାଡ଼ି ରାଜନୀତିକୁ ଲମ୍ଫ ମାରିଥିବା ଅପରାଜିତା ଷଡ଼ଙ୍ଗୀ। ନିର୍ବାଚନ ଘୋଷଣାର ପ୍ରାୟ ୨ମାସ ଆଗରୁ ସେ ଜନସମ୍ପର୍କ ବଢ଼ାଇବାରେ ଲାଗିଛନ୍ତି। ସେ ପୂର୍ବରୁ ଖୋର୍ଦ୍ଧାର ଜିଲ୍ଲାପାଳ ଓ ବିଏମ୍‌ସି କମିଶନର ପଦରେ ରହିଥିବାରୁ ଲୋକେ ତାଙ୍କୁ ଭଲ ଭାବେ ଜାଣିଛନ୍ତି। ତେଣୁ ତାଙ୍କୁ କିଛି ଅସୁବିଧା ହେଉନଥିବ ବୋଲି ଅନୁମାନ କରାଯାଉଛି।ବିଜେପି ପ୍ରାର୍ଥୀ ଅପରାଜିତା ଷଡ଼ଙ୍ଗୀ କହିଛନ୍ତି-“ମୁଁ କାହା ସାଙ୍ଗରେ ପ୍ରତିଯୋଗିତା କରିବାକୁ ଚାହୁଁନାହିଁ। ମୁଁ ହିଁ ନିଜର ସବୁଠାରୁ ବଡ଼ ପ୍ରତିଯୋଗୀ। ମୋତେ ଲୋକମାନଙ୍କଠାରୁ ବହୁ ସମର୍ଥନ ମିଳୁଛି। ସମସ୍ତେ ପରିବର୍ତ୍ତନ ଚାହୁଁଛନ୍ତି।”
ସେପଟେ ଅପରାଜିତାଙ୍କୁ ଟକ୍କର ଦେବାକୁ ବିଜେଡି ଅବସରପ୍ରାପ୍ତ ଆଇପିଏସ୍‌ ତଥା ମୁମ୍ବାଇର ପୂର୍ବତନ ପୁଲିସ କମିଶନର ଅରୂପ ପଟ୍ଟନାୟକଙ୍କୁ ପ୍ରାର୍ଥୀ କରିଛି। ସାମାନ୍ୟ ବିଳମ୍ବରେ ବିଜେଡି ଅରୂପଙ୍କ ନାଁ ଘୋଷଣା କରିଥିଲେ ମଧ୍ୟ ସେ ଲୋକଙ୍କ ପାଖରେ ପହଞ୍ଚିବାକୁ ଜୋରଦାର ଉଦ୍ୟମ ଚଳାଇଛନ୍ତି। ତେବେ ବିଜେଡି ସୁପ୍ରିମୋ ନବୀନ ପଟ୍ଟନାୟକଙ୍କ ଲୋକପ୍ରିୟତା ଓ ବିଜେଡି ଚିହ୍ନ ତାଙ୍କ ପାଇଁ ନିର୍ବାଚନୀ ବୈତରଣୀ ପାର କରିବାରେ ସହାୟକ ହେବ ବୋଲି ଅରୂପ କହିଛନ୍ତି।
ବିଜେପି ଓ ବିଜେଡିର ଆଇଏଏସ୍‌-ଆଇପିଏସ୍‌ ଫାଇଟ୍‌ ଭିତରେ ଭୁବନେଶ୍ୱର ଲୋକସଭା ଆସନରେ ଟାଣୁଆ ବାମ ନେତା ଜନାର୍ଦ୍ଦନ ପତିଙ୍କୁ ମଇଦାନଙ୍କୁ ଓହ୍ଲାଇଛି କଂଗ୍ରେସ-ସିପିଆଇ(ଏମ୍) ମେଣ୍ଟ।

ତେବେ ଓଡ଼ିଶା ରାଜନୀତିରେ ବ୍ୟୁରୋକ୍ରାଟଙ୍କ ପ୍ରବେଶ ନୂଆ ନୁହେଁ। ପ୍ୟାରୀ ମୋହନ ମହାପାତ୍ରଙ୍କଠାରୁ ନେଇ ରାଧାକାନ୍ତ ନାୟକ, ବଟକୃଷ୍ଣ ତ୍ରିପାଠୀ, ଅନାଦି ସାହୁ, ଯତୀଶ ମହାନ୍ତି, ଅଶୋକ ତ୍ରିପାଠୀ, ଅମର ପଟ୍ଟନାୟକଙ୍କ ପର‌୍ୟ୍ୟନ୍ତ ଅନେକ ଉଦାହରଣ ରାଜ୍ୟବାସୀ ଦେଖିଛନ୍ତି। ଅବଶ୍ୟ ଏଥିରୁ କିଏ ସଫଳ ହୋଇଛନ୍ତି ତ କିଏ ବିଫଳତା ସ୍ୱାଦ ଚାଖି ଆପେ ରାଜନୀତିରୁ ଦୂରେଇ ଯାଇଛନ୍ତି। ଆଗାମୀ ସମୟ କହିବ ସ୍ମାଟ ସିଟିରେ କିଏ ହେବ ଲୋକମାନଙ୍କ ପ୍ରଥମ ପସନ୍ଦ  ।