ଓଡିଆନ୍ ନ୍ୟୁଜ

27

ଆଜି ‘ଜନଗଣନା’ ଏବଂ ‘ଏନ୍‌ପିଆର୍‌’ ସଂକ୍ରାନ୍ତରେ କେନ୍ଦ୍ର ସରକାରଙ୍କ ବୈଠକ

Team Odian News |

ନୂଆଦିଲ୍ଲୀ: ଶୁକ୍ରବାର ଦିନ ଜାତୀୟ ରାଜଧାନୀ ଦିଲ୍ଲୀରେ ଗୃହ ବ୍ୟାପାର ମନ୍ତ୍ରାଳୟ ଜନଗଣନା ଏବଂ ନ୍ୟାସ୍‌ନାଲ୍‌ ପପୁଲେସନ୍‌ ରେଜିଷ୍ଟର୍‌ (ଏନ୍‌ପିଆର୍‌) ସଂକ୍ରାନ୍ତରେ ଗୁରୁତ୍ୱପୂର୍ଣ୍ଣ ବୈଠକ ଡକାଇଛି। ପଶ୍ଚିମବଙ୍ଗ ବ୍ୟତୀତ ଅନ୍ୟ ସମସ୍ତ ରାଜ୍ୟର ମୁଖ୍ୟ ସଚିବମାନେ ଏଥିରେ ଯୋଗ ଦେବେ। ଅମ୍ବେଦକର ଭବନରେ ଆୟୋଜନ କରାଯାଇଥିବା ଏହି ବୈଠକରେ ଗୃହ ରାଜ୍ୟ ମନ୍ତ୍ରୀ ନିତ୍ୟାନନ୍ଦ ରାୟ ଅଧ୍ୟକ୍ଷତା କରିବେ।ଆସନ୍ତା ଏପ୍ରିଲ ୧ରୁ ଆରମ୍ଭ ହେଉଛି ଜାତୀୟ ଜନସଂଖ୍ୟା ପଞ୍ଜିକରଣ(ଏନପିଆର) । କେନ୍ଦ୍ର ସରକାରଙ୍କ ନିଷ୍ପତ୍ତିକ୍ରମେ ସମଗ୍ର ଦେଶରେ ଏହି କାର୍ଯ୍ୟକ୍ରମ ଆରମ୍ଭ ହେବାକୁ ଯାଉଛି।  ଏହି ସମୟରେ ଜଣେ ବ୍ୟକ୍ତିଙ୍କୁ ଆଧାର, ଭୋଟର ପରିଚୟ ପତ୍ର, ପାସପୋର୍ଟ ନମ୍ବର ଓ ଡ୍ରାଇଭିଂ ଲାଇସେନ୍ସ ନମ୍ବର ଦେବା ବାଧ୍ୟତାମୂଳକ ହେବ। ଯଦି ଜଣଙ୍କ ପାଖରେ ସେ ପୂର୍ବରୁ ରହୁଥିବା ସ୍ଥାନରେ ଉପରୋକ୍ତ ଯେ କୌଣସି ଦସ୍ତାବିଜ୍‌ ରହିଥିବ, ଏନପିଆର ସମୟରେ ସେ ଏହାକୁ ଦେବାକୁ ବାଧ୍ୟ। ତେବେ ଫର୍ମରେ ଥିବା ପାନ କାର୍ଡ କଲମକୁ ବିରୋଧ ପରେ ହଟାଇ ଦିଆଯାଇଛି ବୋଲି ଗୃହମନ୍ତ୍ରଣାଳୟ ପକ୍ଷରୁ ସ୍ପଷ୍ଟ କରାଯାଇଛି। ଜଣେ ବରିଷ୍ଠ ଅଧିକାରୀ “ସ୍ୱେଚ୍ଛାକୃତ” ଓ “ବିକଳ୍ପ” ଦସ୍ତାବିଜ ସମ୍ପର୍କରେ ବିସ୍ତୃତ ସୂଚନା ଦେଇ କହିଛନ୍ତି, “ଯଦି କୌଣସି ବ୍ୟକ୍ତିଙ୍କ ପାଖରେ ଆଧାର, ଡ୍ରାଇଭିଂ ଲାଇସେନ୍ସ, ଭୋଟର ଆଇଡି କିମ୍ବା ପାସପୋର୍ଟ ନମ୍ବର ନାହିଁ, ତା’ହେଲେ ତାଙ୍କୁ ଏନପିଆର ସମୟରେ ଏହାର ଦସ୍ତାବିଜ ଦେବାର ଆବଶ୍ୟକ ନାହିଁ। କିନ୍ତୁ ଯଦି ଜଣେ ବ୍ୟକ୍ତିଙ୍କ ପାଖରେ ଉପରୋକ୍ତ ଯେକୌଣସି ପରିଚୟ ପତ୍ର ରହିଛି, ତା’ହେଲେ ତାଙ୍କୁ ଏନପିଆର ସମୟରେ ଏହାକୁ ସର୍ଭେ ପାଇଁ ଯାଇଥିବା ଅଧିକାରୀଙ୍କୁ ଦେବାକୁ ପଡ଼ିବ। ଏସବୁ ଦସ୍ତାବିଜ ମଧ୍ୟରୁ ଯେକୌଣସି କାଗଜ ଦେଖାଇବା ବେଳେ ବ୍ୟକ୍ତିଙ୍କୁ ଆଉ କୌଣସି ପ୍ରମାଣପତ୍ର ଦେବାକୁ ପଡ଼ିବ ନାହିଁ। କେନ୍ଦ୍ରମନ୍ତ୍ରୀ ପୀୟୂଷ ଗୋଏଲ ଡିସେମ୍ବର ୨୪ରେ ୨୦୨୧ ଜନଗଣନା ଓ ୨୦୨୦ ଏନପିଆର ସମ୍ପର୍କରେ କ୍ୟାବିନେଟ ନେଇଥିବା ନିଷ୍ପତ୍ତି ସମ୍ପର୍କରେ କହିଥିଲେ ଯେ ଏନପିଆର ବେଳେ ଆଧାର ନମ୍ବର ଦେବା ଜଣେ ବ୍ୟକ୍ତିଙ୍କ ଇଚ୍ଛାକୃତ ବ୍ୟାପାର ହେବ। ସେହିପରି ଅନ୍ୟତମ କେନ୍ଦ୍ରମନ୍ତ୍ରୀ ପ୍ରକାଶ ଜାଭଡେକର କହିଥିଲେ “ଏନପିଆର ସମୟରେ କୌଣସି ଦସ୍ତାବିଜ ଦେଖାଇବାକୁ ପଡ଼ିବ ନାହିଁ। ଲୋକମାନେ ଯାହା କହିବେ, ତା’କୁ ହିଁ ତଥ୍ୟ ଭାବେ ଗ୍ରହଣ କରାଯିବ।”ପ୍ରଥମ ପର୍ଯ୍ୟାୟରେ ଜନଗଣନା ଅଭିଯାନ ନିମନ୍ତେ ୩୦ ଲକ୍ଷ ସରକାରୀ କର୍ମଚାରୀଙ୍କୁ ନିୟୋଜନ କରାଯିବ। ପାରିଶ୍ରମିକ ବାବଦରେ ପ୍ରତ୍ୟେକଙ୍କୁ ୨୫, ୦୦୦ ଟଙ୍କା ଲେଖାଏଁ ଦିଆଯିବ। ଗତ ଥର ଗଣନାକାରୀ ଅଫିସର୍‌ଙ୍କୁ ଏଥି ନିମନ୍ତେ ୫, ୫୦୦ ଟଙ୍କା ମିଳିଥିଲା। ଏଥର ଗଣନାକାରୀ ଅଫିସର୍‌ ଘର ତାଲିକା, ଜନଗଣନା ଏବଂ ଏନ୍‌ପିଆର୍‌ କାର୍ଯ୍ୟ କରିବାକୁ ଥିବାରୁ ପାରିଶ୍ରମିକ ବଢ଼ାଇ ଦିଆଯାଇଛି।