ଓଡିଆନ୍ ନ୍ୟୁଜ

126

କେରଳରେ ବର୍ଷା ତାଣ୍ଡବ: ପ୍ରଧାନମନ୍ତ୍ରୀ ଆକାଶମାର୍ଗରୁ ସ୍ଥିତି ଦେଥିଲେ

Team Odian News |

କେରଳରେ ବର୍ଷା ତାଣ୍ଡବ: ପ୍ରଧାନମନ୍ତ୍ରୀ ଆକାଶମାର୍ଗରୁ ସ୍ଥିତି ଦେଥିଲେ
କୋଚି,୧୮/୮(ଓଡ଼ିଆନ୍ ନ୍ୟୁଜ୍): କେରଳ ବନ୍ୟା ବିଧ୍ୱସ୍ତ ଅଞ୍ଚଳକୁ ଆକାଶମାର୍ଗରୁ ସର୍ବେକ୍ଷଣ କରିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି। ପ୍ରବଳ ବର୍ଷା ଯୋଗୁଁ ପ୍ରଥମେ କାର୍ୟ୍ୟକ୍ରମକୁ ବାତିଲ୍‍ କରାଯାଇଥିଲା। କିନ୍ତୁ ପରେ ବର୍ଷା କମିବାରୁ ସର୍ବେକ୍ଷଣ କାର୍ୟ୍ୟକ୍ରମ ପୁଣି ଆରମ୍ଭ ହୋଇଥିଲା। ଗତ କାଲି ଭିଡିଓ କନ୍‍ଫେରେନ୍ସିଂ ଜରିଆରେ କେରଳ ରାଜ୍ୟପାଳ, ମୁଖମନ୍ତ୍ରୀ ଓ ଅନ୍ୟାନ୍ୟ ଅଧିକାରୀଙ୍କ ସହିତ ପ୍ରଧାନମନ୍ତ୍ରୀ ବନ୍ୟା ସ୍ଥିତି ସମ୍ପର୍କରେ ଆଲୋଚନା କରିଥିଲେ। ଆକାଶମାର୍ଗରୁ ସ୍ଥିତି ଦେଖିବା ପରେ ପ୍ରଧାନମନ୍ତ୍ରୀ ୫୦୦ କୋଟି ଟଙ୍କାର ଅତିରିକ୍ତ ସହାୟତା ରାଶି ଘୋଷଣା କରିଛନ୍ତି। ଏଥିପୂର୍ବରୁ ସ୍ୱରାଷ୍ଟ୍ରମନ୍ତ୍ରୀ ରାଜନାଥ ସିଂହ ଆକାଶମାର୍ଗରୁ ବନ୍ୟାସ୍ଥିତି ଅନୁଧ୍ୟାନ କରିବା ସହିତ ୧୦୦ କୋଟି ଟଙ୍କାର ସହାୟତା ଘୋଷଣା କରିଛନ୍ତି। ଏଥିସହିତ ବନ୍ୟା ଓ ଭୂସ୍ଖଳନରେ ମୃତକଙ୍କ ପରିବାରକୁ ୨ ଲକ୍ଷ ଟଙ୍କା ଏବଂ ଆହତଙ୍କୁ ୫୦ ହଜାର ଟଙ୍କାର କ୍ଷତିପୂରଣ ଦେବାକୁ ପ୍ରଧାନମନ୍ତ୍ରୀ ନିର୍ଦେଶ ଦେଇଛନ୍ତି। ପ୍ରଧାନମନ୍ତ୍ରୀ ରିଲିଫ୍‍ ପାଣ୍ଠିରୁ ଏହି ସହାୟତା ଦିଆଯିବ।
ଇତିମଧ୍ୟରେ କେରଳରେ ବନ୍ୟା ଓ ଭୂସ୍ଫଳନ ଜନିତ ମୃତ୍ୟୁ ସଂଖ୍ୟା ୩୨୪ରେ ପହଞ୍ଚିଥିବା ସରକାରୀ ଭାବେ କୁହାଯାଇଛି। କେରଳ ମୁଖ୍ୟମନ୍ତ୍ରୀ ପିନାରାୟି ବିଜୟନ୍‍ଙ୍କ ସୂଚନା ଅନୁଯାୟୀ, ଗତ ୯ଦିନରେ ୩୨୪ ଜଣଙ୍କ ମୃତ୍ୟୁ ଘଟିଛି। ୩ ଲକ୍ଷ ୧୦ହଜାର ବିପନ୍ନ ଲୋକଙ୍କୁ ୨ ହଜାର ଆଶ୍ରୟସ୍ଥଳରେ ଥଇଥାନ କରାଯାଇଛି। ପ୍ରାୟ ୧ ହଜାର କିମିର ସଡ଼କ ପଥ ବିପର୍ୟ୍ୟସ୍ତ ହୋଇପଡ଼ିଥିବା ବେଳେ ହଜାର ହଜାର ଘର ଭାସି ଯାଇଛି। ରାଜ୍ୟର ଅର୍ଦ୍ଧାଧିକ ଅଞ୍ଚଳରେ ବିଦ୍ୟୁତ ସରବରାହ ବିଚ୍ଛିନ୍ନ ହୋଇଛି। ବର୍ତ୍ତମାନ ସୁଦ୍ଧା ନୌସେନାର ୪୨ଟି ଟିମ୍‍, ସ୍ଥଳ ସେନାର ୧୬ଟିମ୍‍, ତଟ ସୁରକ୍ଷା ବାହିନୀର ୨୮ଟି ଟିମ୍‍ ଓ ଜାତୀୟ ବିପର୍ୟ୍ୟୟ ପ୍ରଶମନ ବାହିନୀର ୩୯ଟି ଟିମ ଉଦ୍ଧାର କାର୍ୟ୍ୟରେ ନିୟୋଜିତ ଅଛନ୍ତି। ଏନ୍‍ଡିଆରଏଫ୍‍ର ଆଉ ୧୪ଟି ଟିମ୍‍କୁ ଖୁବ୍‍ ଶୀଘ୍ର ନିୟୋଜିତ କରାଯିବ। ୩୦ଟି ସେନା ହେଲିକପ୍ଟର ଓ ୩୨୦ଟି ମୋଟର ବୋଟ୍‍ ଉଦ୍ଧାର କାର୍ୟ୍ୟରେ ନିୟୋଜିତ ଅଛନ୍ତି।
ଆଲାପୁଝା, ଏନ୍ନାକୁଲମ୍‍, ଥ୍ରିସୁର ଓ ପାଥାନମଥିଟ୍ଟା ଜିଲାରେ ବନ୍ୟା ପରିସ୍ଥିତି ସଙ୍ଗୀନ ହେବାରେ ଲାଗିଛି। ଏ ପର୍ୟ୍ୟନ୍ତ ଲୋକମାନେ ଗଛ ଓ ଛାତ ଘର ଉପରେ ଆଶ୍ରୟ ନେଇଥିବା ଜଣାପଡ଼ିଛି। ଦୈବୀଦୁର୍ବିପାକରେ ଫସି ରହିଥିବା ସମ୍ପର୍କୀୟଙ୍କ ବିଷୟରେ ସୂଚନା ପାଇଁ ଜିଓ ପକ୍ଷରୁ ସ୍ୱତନ୍ତ୍ର ଡାଟା ଅଫର ଘୋଷଣା କରାଯାଇଛି।