ଓଡିଆନ୍ ନ୍ୟୁଜ

127

ଆଲୋକ ବର୍ମା ମାମଲା:ସିଭିସି ସୁପ୍ରିମକୋର୍ଟରେ ଦାଖଲ କଲେ ପ୍ରାଥମିକ ତଦନ୍ତ ରିପୋର୍ଟ

Team Odian News |

ଆଲୋକ ବର୍ମା ମାମଲା:ସିଭିସି ସୁପ୍ରିମକୋର୍ଟରେ ଦାଖଲ କଲେ ପ୍ରାଥମିକ ତଦନ୍ତ ରିପୋର୍ଟ 

ନୂଆଦିଲ୍ଲୀ,୧୨/୧୧(ଓଡ଼ିଆନ ନ୍ୟୁଜ): ବାଧ୍ୟତାମୂଳକ ଛୁଟିରେ ଥିବା ସିବିଆଇ ମୁଖ୍ୟ ଆଲୋକ ବର୍ମାଙ୍କ ବିରୋଧରେ ଆସିଥିବା ଭ୍ରଷ୍ଟାଚାର ମାମଲାର ପ୍ରାଥମିକ ତଦନ୍ତ ରିପୋର୍ଟ ଆଜି ସେଣ୍ଟ୍ରାଲ ଭିଜିଲାନ୍ସ କମିଶନ(ସିଭିସି) ପକ୍ଷରୁ ସୁପ୍ରିମକୋର୍ଟରେ ଦାଖଲ କରାଯାଇଛି। ଏହି ରିପୋର୍ଟ ସର୍ବୋଚ୍ଚ ଅଦାଲତ ଧାର୍ଯ୍ୟ କରିଥିବା ତାରିଖର ଗୋଟିଏ ଦିନ ପରେ ସିଭିସି ଦାଖଲ କରାଯାଇଥିବା ବେଳେ  ଏଥିପାଇଁ ସୁପ୍ରିମକୋର୍ଟଙ୍କୁ କ୍ଷମା ପ୍ରାର୍ଥନା କରିଛି। ପ୍ରଧାନ ବିଚାରପତି ଜଷ୍ଟିସ୍‌ ରଞ୍ଜନ ଗୋଗୋଇଙ୍କ ଖଣ୍ଡପୀଠ ସିଭିସି ରିପୋର୍ଟ ପାଇବା ପରେ କହିଥିଲେ, “ ଆପଣ ତଦନ୍ତ ରିପୋର୍ଟ ଦାଖଲ କରିବେ ବୋଲି ରବିବାର ଛୁଟି ସତ୍ତ୍ୱେ କୋର୍ଟଙ୍କ ରେଜିଷ୍ଟ୍ରାର ଅଫିସ ଖୋଲା ରହିଥିଲା। ସକାଳୁ ଏହା ଖୋଲା ରହିଥିଲେ ହେଁ ଆପଣ ରପୋର୍ଟ ଦାଖଲ କରିବାକୁ ଆସିଲେନି। ଏପରି କି ଆପଣ ଏ ସଂକ୍ରାନ୍ତରେ ଆମମାନଙ୍କୁ ସୂଚନା ମଧ୍ୟ ଦେଲେନାହିଁ। କ’ଣ ପାଇଁ ଏଭଳି ଅବହେଳା ହେଲା ?” ଏହାର ଜବାବ୍‌ରେ ସିଭିସି ପକ୍ଷରୁ ବରିଷ୍ଠ ଆଇନ୍‌ଜୀବୀ ତୁଷାର ମେହେଟ୍ଟା କହିଥିଲେ “ ଆମେ ଆଲୋକ ବର୍ମାଙ୍କ ବିରୋଧରେ ଆସିଥିବା ଅଭିଯୋଗର ତଦନ୍ତ କରି ଶନିବାର ସୁଦ୍ଧା ରିପୋର୍ଟ ପ୍ରସ୍ତୁତ କରିଥିଲେ ହେଁ ଏହାକୁ ଧାର୍ଯ୍ୟ ସମୟ ମଧ୍ୟରେ ଦାଖଲ କରିପାରିନଥିଲୁ। ଏଥିପାଇଁ ଆମେ  କ୍ଷମା ମାଗୁଛୁ। କିନ୍ତୁ ଆମେ ଧାର୍ଯ୍ୟ ସମୟର ଗୋଟିଏ ଘଣ୍ଟା ପରେ ଆସିଥିଲୁ। କିନ୍ତୁ ୧୧.୩୦ରେ କୋର୍ଟ ରେଜିଷ୍ଟ୍ରାର ଅଫିସ ବନ୍ଦ ହୋଇଯାଇଥିଲା।” ଜଷ୍ଟିସ୍‌ ଗୋଗୋଇଙ୍କ ଖଣ୍ଡପୀଠ ଏହା ଶୁଣିବା ପରେ ଆସନ୍ତା ଶୁକ୍ରବାର ମାମଲାର ପରବର୍ତ୍ତୀ ଶୁଣାଣି କରାଯିବ ବୋଲି କହିଛନ୍ତି। ସିଭିସି ଆଜି ଆଲୋକ ବର୍ମାଙ୍କ ତଦନ୍ତ ରିପୋର୍ଟ ସହ ଅକ୍ଟୋବର ୨୩ରୁ ନିଯୁକ୍ତ ହୋଇଥିବା ସିବିଆଇର ଅନ୍ତରୀଣ ମୁଖ୍ୟ ଏମ୍‌ ନାଗେଶ୍ୱର ରାଓ ନେଇଥିବା ସମସ୍ତ ପ୍ରକାରର ନିଷ୍ପତ୍ତି ସଂକ୍ରାନ୍ତ ଏକ ରିପୋର୍ଟ ବନ୍ଦ ଲଫାପାରେ ଖଣ୍ଡପୀଠଙ୍କୁ ଦେଇଛି।