କୃଷି ଆଇନ ବିରୋଧରେ ଆନ୍ଦୋଳନ ତୀବ୍ର : ଏକାଠି ହେଲେ ହଜାର ହଜାର ସଂଖ୍ୟାରେ ଚାଷୀ

ନୂଆଦିଲ୍ଲୀ ୦୫/୦୯ : କେନ୍ଦ୍ର ସରକାରଙ୍କ ନୂଆ କୃଷି ଆଇନକୁ ବିରୋଧ କରି ଦୀର୍ଘ ଦିନ ହେଲା ବିଭିନ୍ନ ଚାଷୀ ସଂଗଠନ ଆନ୍ଦୋଳନ ଜାରି ରଖିଛନ୍ତି । ରବିବାର ସକାଳେ ବିଭିନ୍ନ ରାଜ୍ୟର କୃଷକ, ମୁଜାଫରନଗର ସ୍ଥିତ ଇଣ୍ଟର କଲେଜ ମୈଦାନରେ ହେବାକୁଥିବା ଚାଷୀ ମହାପଞ୍ଚାୟତ ପାଇଁ ଏକାଠି ହୋଇଛନ୍ତି । ଆସନ୍ତା ବର୍ଷ ଆରମ୍ଭ​‌ରେ ଉତ୍ତର ପ୍ରଦେଶରେ ବିଧାନସଭା ନିର୍ବାଚନ ହେବାକୁ ଥିବାରୁ ପୁଣି ଥରେ ଚେଇଁ ଉଠିଛନ୍ତି ଚାଷୀ ।

କେନ୍ଦ୍ର ସରକାରଙ୍କ ୩ ନୂଆ କୃଷି ଆଇନ ବିରୁଦ୍ଧରେ ଦୀର୍ଘଦିନ ହେଲା ଆନ୍ଦୋଳନ ଜାରି ରଖିଥିବା ବିଭିନ୍ନ ଚାଷୀ ସଂଗଠନ ଏହାକୁ ଆହୁରି ତୀବ୍ର କରିବା ସହିତ କେନ୍ଦ୍ରର ବିଜେପି ସରକାର ଏବଂ ଯୋଗୀ ସରକାରଙ୍କ ବିରୁଦ୍ଧରେ ଭୋଟ ଦେବାକୁ ଲୋକମାନଙ୍କୁ କହିବେ ବୋଲି କହିଛନ୍ତି । ସଂଯୁକ୍ତ କିଷାନ ମୋର୍ଚ୍ଚା ପକ୍ଷରୁ ଚାଷୀ ମହାପଞ୍ଚାୟତ ଆୟୋଜନ କରାଯାଇଛି ।

ଭାରତୀୟ ଚାଷୀ ୟୁନିଅନ ପ୍ରବକ୍ତା ଧର୍ମେନ୍ଦ୍ର ମଲିକ କହିଛନ୍ତି, ଉତ୍ତର ପ୍ରଦେଶ, ହରିୟାଣା, ପଞ୍ଜାବ, ମହାରାଷ୍ଟ୍ର, କର୍ଣ୍ଣାଟକ ଭଳି ରାଜ୍ୟରୁ ପ୍ରାୟ ୩୦୦ଟି ଚାଷୀ ସଂଗଠନର ଚାଷୀ ଏକତ୍ରିତ ହୋଇଛନ୍ତି । ସେଠାରେ ପ୍ରାୟ ୫ ହଜାର ଖାଦ୍ୟ ଷ୍ଟଲ ତିଆରି କରାଯାଇଥିବା ବେଳେ ହଜାର ହଜାର ସଂଖ୍ୟାରେ ଟ୍ରାକ୍ଟର ସେଠା​‌ରେ ପହଞ୍ଚିଛନ୍ତି । ଆୟୋଜନ ସ୍ଥଳ ନିକଟରେ ଅନେକଗୁଡିଏ ସ୍ବାସ୍ଥ୍ୟ କ୍ୟାମ୍ପ ମଧ୍ୟ ତିଆରି କରାଯାଇଛି । ଏତେ ସଂଖ୍ୟକ ଚାଷୀ ଏକାଠି ହୋଇଛନ୍ତି ଯେ ମୁଜାଫରନଗର ସ୍ଥିତ ଇଣ୍ଟର କଲେଜ ମୈଦାନରେ ଆଉ ସ୍ଥାନ ନାହିଁ । ବାଧ୍ୟ ହୋଇ ଚାଷୀମାନଙ୍କ ପାଇଁ ଏଲ୍‌ଇଡି ମାଧ୍ୟମରେ ଦେଖିବା ପାଇଁ ବ୍ୟବସ୍ଥା କରାଯାଇଛି ।

ଭାରତୀୟ ଚାଷୀ ୟୁନିଅନ ପ୍ରବକ୍ତା ରାକେଶ ଟିକାୟତ ମଧ୍ୟ ବିଶାଳ ଚାଷୀ ସମାବେଶରେ ଯୋଗ ଦେଇଛନ୍ତି । ରାକେଶ ଟିକାୟତ କହିଛନ୍ତି, ‘ଚାଷୀ ଆନ୍ଦୋଳନ ସେ ପର୍ଯ୍ୟନ୍ତ ଜାରି ରହିବ ଯେପର୍ଯ୍ୟନ୍ତ ଭାରତ ସରକାର ଚାଲୁରଖିବେ । ଯେପର୍ଯ୍ୟନ୍ତ ନୂଆ କୃଷି ବିଲ ପ୍ରତ୍ୟାହାର ନହୋଇଛି ସେ ଯାଏଁ ଆନ୍ଦୋଳନ ଜାରି ରହିବ । ସ୍ବାଧୀନତାର ଲଢେଇ ୯୦ ବର୍ଷ ଯାଏଁ ଚାଲିଥିଲା କିନ୍ତୁ ଚାଷୀ ଆନ୍ଦୋଳନ କେବେ ଯାଏଁ ଚାଲିବ ତାହାର କୌଣସି ସଠିକ୍‌ ସୂଚନା ନାହିଁ । ଚାଷୀ ମହାପଞ୍ଚାୟତ ସମଗ୍ର ଭାରତରେ ଚାଲିବ । ବିଭିନ୍ନ ସ୍ଥାନରେ ଏଭଳି ଭାବେ ଚାଷୀମାନେ ଏକାଠି ହେବେ ଏବଂ କେନ୍ଦ୍ର ସରକାରଙ୍କ ବିରୁଦ୍ଧରେ ସ୍ବର ଉତ୍ତୋଳନ କରିବେ ।’ସେପଟେ ଚାଷୀ ମହାପଞ୍ଚାୟତକୁ ଦୃଷ୍ଟିରେ ରଖି ସୁରକ୍ଷା ବ୍ୟବସ୍ଥାକୁ ମଧ୍ୟ କଡାକଡି କରାଯାଇଛି । ଉତ୍ତର ପ୍ରଦେଶ ପୋଲିସ ଏଡିଜି ପ୍ରଶାନ୍ତ କୁମାର କହିଛନ୍ତି, ‘ଚାଷୀ ମହାପଞ୍ଚାୟତକୁ ନେଇ ସମସ୍ତ ପ୍ରକାର ସୁରକ୍ଷା ବ୍ୟବସ୍ଥା କରାଯାଇଛି । ସେଠାରେ ବ୍ୟାପକ ପୋଲିସ ଫୋର୍ସ ମୁତୟନ କରାଯାଇଛି । ସେଠାରେ ଯାତାୟତ କରୁଥିବା ଲୋକମାନଙ୍କର ଯେଭଳି କୌଣସି ସମସ୍ୟା ନହେବ ସେ ନେଇ ମଧ୍ୟ ସମସ୍ତ ପ୍ରକାର ବ୍ୟବସ୍ଥା କରାଯାଇଛି । ଚାଷୀଙ୍କ ଭିଡକୁ ଦୃଷ୍ଟିରେ ରଖି ବିଭିନ୍ନ ସ୍ଥାନରେ ସିସିଟିଭି ଲଗାଯାଇଛି । ବର୍ତ୍ତମାନ ସବୁକିଛି ଶାନ୍ତିପୂର୍ଣ୍ଣ ଭାବେ ଚାଲିଛି । ଏହାସହିତ ଚାଷୀଙ୍କୁ ମଧ୍ୟ ସତର୍କ କରାଯାଇଛି ଯେ କୌଣସି ମତେ କିଛି ଅପ୍ରୀତିକର ପରିସ୍ଥିତି ସୃଷ୍ଟି ନହେଉ ।’