ଭିତରକନିକାରେ ଚାଲିଲା ବ୍ୟାଟେରିଚାଳିତ ବୋଟ୍‌

ରାଜନଗର,୨୨/୦୩: ବିଶ୍ୱ ପ୍ରସିଦ୍ଧ ଭିତରକନିକା ଜାତୀୟ ଉଦ୍ୟାନରେ ବ୍ୟାଟେରିଚାଳିତ ବୋଟ୍‌ ସେବା ଆରମ୍ଭ ହୋଇଛି । ଫାଇବର ପ୍ଲାଷ୍ଟିକ୍‌ରେ (ଏଫ୍‌ଆର୍‌ପି) ପ୍ରସ୍ତୁତ ବୋଟ୍‌ରେ ଇଞ୍ଜିନ୍‌ ଓ ବ୍ୟାଟେରି ସଂଯୋଗ କରାଯାଇ ଏହାକୁ ପର୍ଯ୍ୟଟକଙ୍କ ଲାଗି ଉତ୍ସର୍ଗ କରାଯାଇଛି । ଏହାର ନାଁ ‘ଭାନିକ’ ରଖାଯାଇଛି । ଏହି ବୋଟରେ ୮ଜଣ ବସି ପାରିବେ । ଏହାର ଲମ୍ବ ସାଢ଼େ ୫ ମିଟର । ବୋଟ୍‌ଟି କୋଚିରୁ ଆସିଥିବା ବେଳେ ଇଞ୍ଜିନ୍‌ ଚେନ୍ନାଇରୁ ଓ ବ୍ୟାଟେରୀ କୋଲକତାରୁ ଅଣାଯାଇଛି । ୨୦ ହର୍ସ ପାୱାର୍‌ ବିଶିଷ୍ଟ ଏହି ବୋଟ୍‌ଟି ୪ ଘଣ୍ଟାରେ ସମ୍ପୂର୍ଣ୍ଣ ଚାର୍ଜ ହୋଇଥାଏ । ଏହା ଉଭୟ ବିଦ୍ୟୁତ୍‌ ଏବଂ ସୌରଶକ୍ତିରୁ ଚାର୍ଜ ହୋଇପାରିବ। ପ୍ରତି ଘଣ୍ଟାକୁ ୧୦ରୁ ୧୮ କିମି ବେଗରେ ଚାଲି ପାରିବ । ସବୁଠୁ ବଡ଼ କଥା ହେଲା ବୋଟ୍‌ଟି ଶବ୍ଦବିହୀନ । ଫଳରେ ଜଳଚର ଜୀବଙ୍କ ବିଚରଣରେ ଏହା ବାଧକ ସାଜିବ ନାହିଁ ବୋଲି ବୋଟ୍‌କୁ ଉଦ୍‌ଘାଟନ କରିବା ଅବସରରେ ରାଜନଗର ଡିଏଫଓ ଡ. ଯଜ୍ଞଦତ୍ତ ପତି ସୂଚନା ଦେଇଛନ୍ତି । ଉଦ୍‌ଘାଟନ ଉତ୍ସବରେ କନିକା ରେଞ୍ଜ୍‌ ଅଫିସର ମାନସ କୁମାର ଦାସ, ରାଜନଗର ରେଞ୍ଜ୍‌ ଅଫିସର ଧନେଶ୍ୱର ରଥ, ଗହୀରମଥା ରେଞ୍ଜ୍‌ ଅଫିସର ଦେବାଶିଷ ଭୋଇ ଉପସ୍ଥିତ ଥିଲେ ।

ଅନ୍ତର୍ଜାତୀୟରୁ ଆରମ୍ଭ କରି ଜାତୀୟ ତଥା ରାଜ୍ୟର ୩୧୪ ବ୍ଲକରେ ଘଟୁଥିବା ପ୍ରତିଟି ଘଟଣା ଉପରେ ଓଡିଆନ୍ ନ୍ୟୁଜ ଆପଣଙ୍କୁ ଦେଉଛି ୨୪ ଘଂଟିଆ ଅପଡେଟ | କରୋନାର ସଂକଟ ସମୟରେ ଆମେ ଲୋଡୁଛୁ ଆପଣଙ୍କ ସହଯୋଗ । ଓଡିଆନ୍ ନ୍ୟୁଜ ଡିଜିଟାଲ ମିଡିଆକୁ ଆର୍ଥିକ ସମର୍ଥନ ଜଣାଇ ଆଂଚଳିକ ସାମ୍ବାଦିକତାକୁ ଶକ୍ତିଶାଳୀ କରନ୍ତୁ |

SUPPORT US

Spread the love
error: Content is protected !!
%d bloggers like this: