ମଶା ବୃଦ୍ଧିଚକ୍ରକୁ ନଷ୍ଟ କରିବାକୁ ବିଏମ୍‌ସିର ଡ୍ରାଇ ଡେ ଅଭିଯାନ

ଭୁବନେଶ୍ୱର,୨୨/୬ :    ଡେଙ୍ଗୁକୁ ଆଗକୁ ବଢ଼ିବାକୁ ଦେବାନି ।  ବିଏମ୍‌ସିରେ ବସିଥିବା ଏକ ଗୁରୁତ୍ୱପୂର୍ଣ୍ଣ ବୈଠକରେ ନବନିଯୁକ୍ତ କମିଶନର ବିଜୟ ଅମୃତ କୁଲାଙ୍ଗେ ଅଧିକାରୀଙ୍କୁ ଏଭଳି ପରାମର୍ଶ ଦେଇଛନ୍ତି । କୋଭିଡ୍‌ ସଂକ୍ରମଣରେ ଅଗଷ୍ଟ ମାସରେ ଡେଙ୍ଗୁ ଚରମରେ ପହଞ୍ଚିଥିଲା । ଏଥର ଏହାକୁ ଆଦୌ ହାଲୁକାରେ ନେବାନି । ଡେଙ୍ଗୁ ମଶା ବଂଶବୃଦ୍ଧିର ଶୃଙ୍ଖଳ ଭାଙ୍ଗିବାକୁ ଗୁରୁବାର ଓ ରବିବାର ଡ୍ରାଇ ଡେ’ ପାଳିବାକୁ ନିଷ୍ପତ୍ତି ହୋଇଛି । ଏହି ୨ ଦିନ ପ୍ରତି ୱାର୍ଡରେ ଘର ଘର ବୁଲି ମଶାଉତ୍ସକୁ ନଷ୍ଟ କରିବାକୁ ନିର୍ଦ୍ଦେଶ ଦିଆଯାଇଛି । ଡେଙ୍ଗୁକୁ ଏଡ଼ାଇବାକୁ ହେଲେ ଲୋକଙ୍କୁ ବ୍ୟାପକ ସଚେତନ କରିବାକୁ  ପଡ଼ିବ ବୋଲି କମିଶନର କୁଲାଙ୍ଗେ କହିଛନ୍ତି । ଲୋକଙ୍କ ଭାଗିଦାରୀରେ ଡେଙ୍ଗୁ ନିୟନ୍ତ୍ରଣ କରାଯିବ । କର୍ପୋରେଟର, ବିଏମ୍‌ସି ଅଫିସର, ସ୍ୱାସ୍ଥ୍ୟ କର୍ମଚାରୀ ଓ ସ୍ୱେଚ୍ଛାସେବୀଙ୍କ ସହଯୋଗରେ ଡ୍ରାଇ ଡେ ଅଭିଯାନ ଚାଲିବ । ମଶା ବୃଦ୍ଧିଚକ୍ରକୁ ନଷ୍ଟ କରିବାକୁ ଏହି ଅଭିଯାନର ଉଦ୍ଦେଶ୍ୟ । ଦୀର୍ଘ ଦିନ ଧରି କୌଣସି ପାତ୍ର ବା ସାମଗ୍ରୀରେ ସ୍ଥିର ହୋଇ ପାଣି ଜମିଲେ ଡେଙ୍ଗୁ ମଶା ବଂଶ ବଢ଼ାନ୍ତି । ଏଣୁ ଗୁରୁବାର ଓ ରବିବାର ୨ ଦିନ ଏହି ମଶା ବଂଶ ବଢୁଥିବା ଉତ୍ସକୁ ସଫା କରିବାକୁ ନିଷ୍ପତ୍ତି ହୋଇଛି ।  ଡେଙ୍ଗୁ ରୋକିବାକୁ କମିଶନର ଏହି ପଦକ୍ଷେପ ଲାଗୁ କରିଛନ୍ତି । କେବଳ କ୍ୟାପିଟାଲ ହସ୍ପିଟାଲ, ଆରଏମ୍‌ଆରସି ଭଳି ସୀମିତ ସ୍ଥାନରେ ଡେଙ୍ଗୁ ପରୀକ୍ଷା ହେଉଥିଲା । ଏବେ କିନ୍ତୁ ସବୁ ପ୍ରାଥମିକ ସ୍ୱାସ୍ଥ୍ୟକେନ୍ଦ୍ର(ପିଏଚ୍‌ସି) ଓ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ର(ସିଏଚ୍‌ସି)ରେ ଡେଙ୍ଗୁ ପରୀକ୍ଷା ପାଇଁ ରକ୍ତ ନମୁନା ସଂଗ୍ରହ ହେବ । ଖୁବ୍‌ଶୀଘ୍ର ଏହା ଆରମ୍ଭ କରିିବାକୁ ବୈଠକରେ ନିଷ୍ପତ୍ତି ହୋଇଛି । ସେହିଭଳି ରାଜଧାନୀରେ ଥିବା ସମସ୍ତ ସ୍କୁଲରେ ପ୍ରାର୍ଥନା କାଳରେ ଡେଙ୍ଗୁ ସଚେତନତା କରାଯିବ ବୋଲି କମିଶନର କୁଲାଙ୍ଗେ କହିଛନ୍ତି । ଘର ପାଖରେ ପାଣି ଜମିବାକୁ ନ ଦେବା, ପାଣି ଜମୁଥିବା ପରିତ୍ୟକ୍ତ ପାତ୍ରକୁ ନଷ୍ଟ କରିବାକୁ ବିଏମ୍‌ସି ମେୟର ସୁଲୋଚନା ଦାସ ଲୋକଙ୍କୁ ଅନୁରୋଧ କରିଛନ୍ତି । ଡେପୁଟି ମେୟର ମଞ୍ଜୁଲତା କହଁର, ଅତିରିକ୍ତ କମିଶନର ଲକ୍ଷ୍ମୀକାନ୍ତ ସେଠୀ, ଡେପୁଟି କମିଶନର ଶୁଭେନ୍ଦୁ ସାହୁ ଓ ଅନ୍ୟ କର୍ପୋରେଟରମାନେ ଏହି ବୈଠକରେ ଉପସ୍ଥିତ ଥିଲେ ।

ଅନ୍ତର୍ଜାତୀୟରୁ ଆରମ୍ଭ କରି ଜାତୀୟ ତଥା ରାଜ୍ୟର ୩୧୪ ବ୍ଲକରେ ଘଟୁଥିବା ପ୍ରତିଟି ଘଟଣା ଉପରେ ଓଡିଆନ୍ ନ୍ୟୁଜ ଆପଣଙ୍କୁ ଦେଉଛି ୨୪ ଘଂଟିଆ ଅପଡେଟ | କରୋନାର ସଂକଟ ସମୟରେ ଆମେ ଲୋଡୁଛୁ ଆପଣଙ୍କ ସହଯୋଗ । ଓଡିଆନ୍ ନ୍ୟୁଜ ଡିଜିଟାଲ ମିଡିଆକୁ ଆର୍ଥିକ ସମର୍ଥନ ଜଣାଇ ଆଂଚଳିକ ସାମ୍ବାଦିକତାକୁ ଶକ୍ତିଶାଳୀ କରନ୍ତୁ |

SUPPORT US

Spread the love
error: Content is protected !!
%d bloggers like this: