୨୦୨୪ ନିର୍ବାଚନ, ଆମେଠିରୁ ସ୍ମୃତି ଇରାନିଙ୍କୁ ଟକ୍କର ଦେବେ ରାହୁଲ

ଆମେଠି,୧୮।୮: ଆସନ୍ତା ବର୍ଷ ଅର୍ଥାତ୍‌ ୨୦୨୪ରେ ଦେଶରେ ଲୋକ ସଭା ନିର୍ବାଚନ ହେବାକୁ ଯାଉଛି। ଏହି ନିର୍ବାଚନରେ ନ୍ୟାସନାଲ ଡେମୋକ୍ରାଟିକ ଆଲାଏନ୍ସ (ଏନଡିଏ) ଏବଂ ବିରୋଧୀ ଦଳ ଇଣ୍ଡିଆ (I.N.D.I.A) ମଧ୍ୟରେ ଏକ ରୋମାଞ୍ଚକର ପ୍ରତିଯୋଗିତା ଦେଖିବାକୁ ମିଳେ। ଏଥର ଦେଶର ଅନ୍ୟତମ ବୃହତ୍ତମ ରାଜ୍ୟ ଉତ୍ତରପ୍ରଦେଶର କେଉଁ ଦଳକୁ କେତେ ସିଟ ଯିବ ସେନେଇ ସମସ୍ତ ରାଜନୈତିକ ଦଳ ନିଜର ରଣନୀତି ପ୍ରସ୍ତୁତ କରୁଛନ୍ତି। ଆମେଠି ଲୋକ ସଭା ଆସନରେ କିଏ ଜିତିବ ତାହାବି ଏବେ ପ୍ରଶ୍ନବାଚି ହୋଇ ରହିଛି। ଏ ସମ୍ପର୍କରେ କଂଗ୍ରେସ ନିଜର ପ୍ରାର୍ଥୀ ଘୋଷଣା କରିଛି।କଂଗ୍ରେସର ୱାୟନାଡ ସାଂସଦ ରାହୁଲ ଗାନ୍ଧି ୨୦୨୪ ଲୋକସଭା ନିର୍ବାଚନ ଉତ୍ତର ପ୍ରଦେଶର ଆମେଥିରୁ ଲଢ଼ିବେ। କଂଗ୍ରେସର ଗଡ଼ ଭାବେ ପରିଚିତ ଆମେଥିରେ ରାହୁଲ ୨୦୧୯ରେ ହାରି ଯାଇଥିଲେ। କିନ୍ତୁ ୨୦୨୪ରେ ସେ ପୁଣି ଏହି ଆସନରୁ ପ୍ରାର୍ଥୀ ହେବେ ବୋଲି ଆଜି ଉତ୍ତର ପ୍ରଦେଶର କଂଗ୍ରେସ ମୁଖ୍ୟ ଅଜୟ ରାୟ ସୂଚନା ଦେଇଛନ୍ତି।ସେ କହିଛନ୍ତି, “ରାହୁଲ ଗାନ୍ଧି ୨୦୨୪ ନିର୍ବାଚନ ଆମେଥିରୁ ନିଶ୍ଚିତ ଲଢ଼ିବେ।” ପ୍ରିୟଙ୍କା ଗାନ୍ଧି ଭଦ୍ରା ୨୦୨୪ ନିର୍ବାଚନ ଲଢ଼ି ପାରନ୍ତି ବୋଲି ହେଉଥିବା ଚର୍ଚ୍ଚା ପ୍ରସଙ୍ଗରେ ଅଜୟ ରାୟ କହିଛନ୍ତି, “ସେ ଯେଉଁଠି ଚାହିଁବେ, ସେଠାରୁ ନିର୍ବାଚନ ଲଢ଼ିପାରିବେ। ଯଦି ପ୍ରିୟଙ୍କା ଗାନ୍ଧି ବାରାଣସୀରୁ ଲଢ଼ିବାକୁ ଚାହୁଁଛନ୍ତି, ତା’ହେଲେ ସେଠାରେ କେମିତି ସେ ଜିତିବେ ସେଥିପାଇଁ ସବୁ ବ୍ୟବସ୍ଥା କରାଯିବ।”ଉତ୍ତରପ୍ରଦେଶର ନବନିଯୁକ୍ତ ସଭାପତି ଅଜୟ ରାୟ (ୟୁପି କଂଗ୍ରେସ ମୁଖ୍ୟ ଅଜୟ ରାୟ) ଶୁକ୍ରବାର ଏକ ବଡ଼ ଘୋଷଣା କରିଛନ୍ତି। ସେ କହିଛନ୍ତି ଯେ କଂଗ୍ରେସର ପୂର୍ବତନ ସଭାପତି ରାହୁଲ ଗାନ୍ଧୀ ଥରେ ଆମେଠିରୁ ପ୍ରତିଦ୍ୱନ୍ଦ୍ୱିତା କରିବେ। ଏଥର ସେ ଆମେଠିର ବର୍ତ୍ତମାନର ଏମପି ତଥା କେନ୍ଦ୍ର ମନ୍ତ୍ରୀ ସ୍ମୃତି ଇରାନୀଙ୍କୁ ଟକ୍କର ଦେବେ। ଏହା ସହିତ ଅଜୟ ରାୟ କହିଛନ୍ତି ଯେ କଂଗ୍ରେସ ମହାସଚିବ ପ୍ରିୟଙ୍କା ଗାନ୍ଧୀ ଯେଉଁଠି ଚାହିଁବେ ଲୋକ ସଭା ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବେ।