ନୂଆଦିଲ୍ଲୀ,୨୬।୪: ଦେଶର ବିଶିଷ୍ଟ ଫଟୋ ଜର୍ଣ୍ଣାଲିଷ୍ଟ ତଥା କିମ୍ବଦନ୍ତୀ ଫଟୋଗ୍ରାଫର ରଘୁ ରାୟଙ୍କର ରବିବାର ପରଲୋକ ହୋଇଯାଇଛି। ମୃତ୍ୟୁ ବେଳକୁ ତାଙ୍କୁ ୮୩ ବର୍ଷ ବୟସ ହୋଇଥିଲା। ତାଙ୍କ ପରିବାର ପକ୍ଷରୁ ରଘୁ ରାୟଙ୍କ ଅଫିସିଆଲ ଇନଷ୍ଟାଗ୍ରାମ ହ୍ୟାଣ୍ଡେଲ ମାଧ୍ୟମରେ ଏହି ଦୁଃଖଦ ସୂଚନା ଦିଆଯାଇଛି। ଆଜି ଅପରାହ୍ନ ୪ଟାରେ ଦିଲ୍ଲୀର ଲୋଧି ଶ୍ମଶାନ ଘାଟରେ ତାଙ୍କର ଶେଷକୃତ୍ୟ ସମ୍ପନ୍ନ କରାଯିବ।ଦୀର୍ଘ ଦିନରୁ ଏକ ଘରୋଇ ହସ୍ପିଟାଲରେ ତାଙ୍କ ଚିକିତ୍ସା ଜାରି ରହିଥିଲା। ସେ ତାଙ୍କ କ୍ୟାମେରା ମାଧ୍ୟମରେ ଭାରତର ବିବିଧ ରଙ୍ଗ ଏବଂ ଜୀବନର ଅନେକ ଦିଗକୁ କଏଦ କରିଥିଲେ। ତାଙ୍କ ପୁଅ ଫଟୋଗ୍ରାଫର ନୀତିନ ରାୟ କହିଛନ୍ତି, “ମୋ ବାପାଙ୍କୁ ଦୁଇ ବର୍ଷ ପୂର୍ବେ ପ୍ରୋଷ୍ଟେଟ୍ କର୍କଟ ରୋଗ ଚିହ୍ନଟ କରାଯାଇଥିଲା। ଯାହା ସୁସ୍ଥ ହୋଇଥିଲା। କିନ୍ତୁ ପରେ କର୍କଟ ତାଙ୍କ ପେଟକୁ ବ୍ୟାପିଥିଲା। ତାହା ମଧ୍ୟ ସୁସ୍ଥ ହୋଇଥିଲା। ସମ୍ପ୍ରତି, କର୍କଟ ତାଙ୍କ ମସ୍ତିଷ୍କକୁ ବ୍ୟାପିଥିଲା ଏବଂ ତାଙ୍କର ବୟସ ସମ୍ବନ୍ଧୀୟ ଅନ୍ୟାନ୍ୟ ସମସ୍ୟା ମଧ୍ୟ ଥିଲା। ତେବେ ରଘୁଙ୍କ ପରିବାରରେ ତାଙ୍କ ସ୍ତ୍ରୀ ଗୁରମିତ୍, ପୁଅ ନୀତିନ୍ ଏବଂ ଝିଅ ଲଗନ୍ ଅଛନ୍ତି। ଆଜି ଲୋଧି ଶ୍ମଶାନରେ ତାଙ୍କର ଶେଷକୃତ୍ୟ ହେବା ନେଇ ସୂଚନା ମିଳିଛି।ରଘୁ ରାୟ ୧୯୪୨ ମସିହାରେ ପଞ୍ଜାବର ଝାଙ୍ଗରେ ଜନ୍ମଗ୍ରହଣ କରିଥିଲେ। ଏହି ଅଞ୍ଚଳ ବର୍ତ୍ତମାନ ପାକିସ୍ତାନର ଅଂଶ। ୧୯୬୨ ମସିହାରେ, ସେ ତାଙ୍କ ବଡ଼ ଭାଇ ଏସ. ପାଉଲଙ୍କ ଠାରୁ ଫଟୋଗ୍ରାଫି ଶିଖିବା ଆରମ୍ଭ କରିଥିଲେ। ସେ ୧୯୬୦ ଦଶକର ମଧ୍ୟଭାଗରେ ଦି ଷ୍ଟେଟସମ୍ୟାନରେ ଫଟୋଗ୍ରାଫର ଭାବରେ କାମ କରି ନିଜର କ୍ୟାରିଅର ଆରମ୍ଭ କରିଥିଲେ। ତାଙ୍କ କ୍ୟାରିଅର ସମୟରେ ସେ ଅନେକ ଐତିହାସିକ ଘଟଣାବଳୀକୁ କଏଦ କରିଥିଲେ। ୧୯୭୬ ମସିହାରେ, ରଘୁ ରାୟ ଦି ଷ୍ଟେଟସମ୍ୟାନ ଛାଡି ସାପ୍ତାହିକ ପତ୍ରିକା ରବିବାରରେ ଏକ ଚିତ୍ର ସମ୍ପାଦକ ଭାବରେ କାମ କରିବା ଆରମ୍ଭ କରିଥିଲେ। ରାୟ ୧୯୮୪ ମସିହାରେ ଭୋପାଳ ଗ୍ୟାସ ଟ୍ରାଜେଡିକୁ ମଧ୍ୟ କଏଦ କରିଥିଲେ ଏବଂ ଏହି ଟ୍ରାଜେଡିର ପ୍ରଭାବ ଉପରେ କାମ କରିଥିଲେ। ରଘୁ ରାୟ ଜଣେ ଫଟୋଗ୍ରାଫର ସହ ଲେଖକ ମଧ୍ୟ ଥିଲେ। ଭାରତର ଲୋକ, ସଂସ୍କୃତି ଏବଂ ସହର ଉପରେ ୧୮ ରୁ ଅଧିକ ପୁସ୍ତକ ଲେଖିଥିଲେ। ତାଙ୍କ କାର୍ଯ୍ୟ ବିଶ୍ୱର ପ୍ରତିଷ୍ଠିତ ପ୍ଲାଟଫର୍ମରେ ସ୍ୱୀକୃତି ପାଇଛି। ୧୯୭୨ ମସିହାରେ ବାଂଲାଦେଶ ମୁକ୍ତି ଯୁଦ୍ଧର କଭରେଜ୍ ପାଇଁ ତାଙ୍କୁ ପଦ୍ମଶ୍ରୀ ମଧ୍ୟ ପ୍ରଦାନ କରାଯାଇଥିଲା।
ଅନ୍ତର୍ଜାତୀୟରୁ ଆରମ୍ଭ କରି ଜାତୀୟ ତଥା ରାଜ୍ୟର ୩୧୪ ବ୍ଲକରେ ଘଟୁଥିବା ପ୍ରତିଟି ଘଟଣା ଉପରେ ଓଡିଆନ୍ ନ୍ୟୁଜ ଆପଣଙ୍କୁ ଦେଉଛି ୨୪ ଘଂଟିଆ ଅପଡେଟ | କରୋନାର ସଂକଟ ସମୟରେ ଆମେ ଲୋଡୁଛୁ ଆପଣଙ୍କ ସହଯୋଗ । ଓଡିଆନ୍ ନ୍ୟୁଜ ଡିଜିଟାଲ ମିଡିଆକୁ ଆର୍ଥିକ ସମର୍ଥନ ଜଣାଇ ଆଂଚଳିକ ସାମ୍ବାଦିକତାକୁ ଶକ୍ତିଶାଳୀ କରନ୍ତୁ |