ଜି-୨୦ ସମ୍ମିଳନୀ: ସେପ୍ଟେମ୍ବର ୮ରୁ ୩ ଦିନ ରାଜଧାନୀର ସବୁ ସ୍କୁଲ ଓ ଅଫିସ ବନ୍ଦ

ନୂଆଦିଲ୍ଲୀ,୨୩।୮:ଜି -୨୦ ଶିଖର ସମ୍ମିଳନୀକୁ ଦୃଷ୍ଟିରେ ରଖି ସେପ୍ଟେମ୍ବର ୮ ରୁ ୧୦ ପର୍ଯ୍ୟନ୍ତ ଦିଲ୍ଲୀରେ ସାଧାରଣ ଛୁଟି ଘୋଷଣା କରିବାକୁ ପ୍ରସ୍ତାବକୁ ଅନୁମତି ମିଳିଛି । ଏହି ତାରିଖରେ ଏମସିଡି କାର୍ଯ୍ୟାଳୟ ସମେତ ସମସ୍ତ ବିଦ୍ୟାଳୟ, ସରକାରୀ କାର୍ଯ୍ୟାଳୟ ବନ୍ଦ ରହିବ । ବିଭିନ୍ନ ଦେଶରୁ ଆସୁଥିବା ପ୍ରତିନିଧି ମାନଙ୍କ ସୁରକ୍ଷାକୁ ଦୃଷ୍ଟିରେ ରଖି ଦିଲ୍ଲୀ ପୋଲିସ ଦିଲ୍ଲୀର ମୁଖ୍ୟ ଶାସନ ସଚିବଙ୍କୁ ନୂଆଦିଲ୍ଲୀରେ ହେବାକୁ ଥିବା ଜି -୨୦ ଶିଖର ସମ୍ମିଳନୀ ତଥା ‘ନିୟନ୍ତ୍ରିତ ଅଞ୍ଚଳରେ’ ବାଣିଜ୍ୟିକ ତଥା ବ୍ୟବସାୟ ପ୍ରତିଷ୍ଠାନ ପାଇଁ ସେପ୍ଟେମ୍ବର ୮ ରୁ ୧୦ ତାରିଖ ପର୍ଯ୍ୟନ୍ତ ସାଧାରଣ ଛୁଟି ଘୋଷଣା କରିବାକୁ କହିଛି ।ଦେଶର ରାଜଧାନୀ ଦିଲ୍ଲୀରେ ଥିବା ସମସ୍ତ ସ୍କୁଲ ଓ ସରକାରୀ ଅଫିସ ସେପ୍ଟମ୍ବର ୮, ୯ ଓ ୧୦ ତାରିଖରେ ବନ୍ଦ ରହିବ। ଦିଲ୍ଲୀରେ ଜି-୨୦ ଶିଖର ସମ୍ମିଳନୀ ଅନୁଷ୍ଠିତ ହେବାକୁ ଯାଉଥିବାରୁ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ଆଜି ଏପରି ଘୋଷଣା କରିଛନ୍ତି।କେବଳ ସରକାରୀ ଅଫିସ କିମ୍ବା ସ୍କୁଲ ନୁହେଁ, ନୂଆଦିଲ୍ଲୀ ଜିଲ୍ଲାର ନିୟନ୍ତ୍ରଣ ଜୋନ ମଧ୍ୟରେ ଆସୁଥିବା ବ୍ୟବସାୟିକ ପ୍ରତିଷ୍ଠାନ ଓ ମାର୍କେଟ ମଧ୍ୟ ଏହି ୩ ଦିନ ବନ୍ଦ ରହିବ। ଭିଡ଼ ଓ ସୁରକ୍ଷା ଦୃଷ୍ଟିରୁ ୩ ଦିନ ଛୁଟି ପ୍ରସ୍ତାବ ପ୍ରଥମେ ପୁଲିସ୍‌ ପକ୍ଷରୁ ମୁଖ୍ୟ ଶାସନ ସଚିବ ନରେଶ କୁମାରଙ୍କୁ ଦିଆଯାଇଥିଲାସେ ଏହାର ମଞ୍ଜୁରୀ ପାଇଁ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲଙ୍କ ପାଖକୁ ପଠାଇଥିଲେ। ଆଜି ଏହି ପ୍ରସ୍ତାବ ଅନୁଯାୟୀ, କେଜ୍ରିୱାଲ ସେପ୍ଟେମ୍ବର ୮, ୯ ଓ ୧୦ ତାରିଖକୁ ଛୁଟି ଘୋଷଣା କରିଛନ୍ତି।ଦିଲ୍ଲୀ ପୁଲିସ୍‌ ଅଗଷ୍ଟ ୧୮ରେ ଚିଠି ଲେଖି ମୁଖ୍ୟ ଶାସନ ସଚିବଙ୍କୁ ପ୍ରସ୍ତାବ ଦେଇଥିଲା ଯେ ସରକାର ଜି-୨୦ ସମ୍ମିଳନୀ ଦୃଷ୍ଟିରୁ ନୂଆଦିଲ୍ଲୀ ଅଞ୍ଚଳ ମଧ୍ୟରେ ଆସୁଥିବା ସମସ୍ତ ବ୍ୟବସାୟିକ ପ୍ରତିଷ୍ଠାନକୁ ସେପ୍ଟେମ୍ବର ୮ରୁ ୧୦ ତାରିଖ ଯାଏ ବନ୍ଦ ରଖନ୍ତୁ। ସୁରକ୍ଷା ଦୃଷ୍ଟିରୁ ସୁପ୍ରିମକୋର୍ଟ ଓ କେନ୍ଦ୍ରୀୟ ସଚିବାଳୟ ମେଟ୍ରୋକୁ ବନ୍ଦ ରଖାଯାଉ।ଏହାବାଦ ସେପ୍ଟେମ୍ବର ୮ରୁ ୧୦ ଯାଏ ଜରୁରୀ ସେବା ବ୍ୟତୀତ ଅଲଗା କାମରେ ନିୟୋଜିତ ଥିବା ବଡ଼ ଗାଡ଼ିକୁ ସହର ଭିତରେ ପ୍ରବେଶ କରିବା ପାଇଁ ବାରଣ କରାଯାଉ ବୋଲି ଦିଲ୍ଲୀ ପୁଲିସ୍‌ ଚିଠିରେ ଲେଖିଥିଲା। ଏବେ କେଜ୍ରିୱାଲ ପୁଲିସ୍‌ର ପ୍ରସ୍ତାବକୁ ଗ୍ରହଣ କରି ଛୁଟି ଘୋଷଣା କରିଛନ୍ତି।ଭାରତ ବର୍ତ୍ତମାନ ଜି-୨୦ର ଅଧ୍ୟକ୍ଷ ଦାୟିତ୍ୱରେ ରହିଛି। ଦେଶ ପକ୍ଷରୁ ଚଳିତ ବର୍ଷ ବିଭିନ୍ନ ସ୍ଥାନରେ ଜି-୨୦ର ଅନେକ ସମ୍ମିଳନୀ ଆୟୋଜନ କରାଯାଇଛି। ଏବେ ଏହାର ମୁଖ୍ୟ କାର୍ଯ୍ୟକ୍ରମ ସେପ୍ଟେମ୍ବର ୯ ଓ ୧୦ ତାରିଖରେ ଦିଲ୍ଲୀରେ ଆୟୋଜନ ହେବ।ଏଥିରେ ୨୯ଟି ଦେଶର ମୁଖ୍ୟ ଓ ୟୁରୋପୀୟ ୟୁନିୟନର ବରିଷ୍ଠ ସଦସ୍ୟମାନେ ଯୋଗ ଦେବାର କାର୍ଯ୍ୟକ୍ରମ ରହିଛି। ଏଥିସହ ୧୪ଟି ଅନ୍ତର୍ଜାତୀୟ ସଂଗଠନର ମୁଖ୍ୟ ବି ଜି-୨୦ ସମ୍ମିଳନୀରେ ସାମିଲ ହେବାର ଯୋଜନା ରହିଛି।