ପୁରୀ,୦୫/୧୦:୪ ଭକ୍ତ ନିବାସର ଆତିଥେୟତା ଢାଞ୍ଚା ବଦଳିବ|ଶ୍ରୀଜଗନ୍ନାଥ ମନ୍ଦିର ପ୍ରଶାସନ ଅଧୀନରେ ଥିବା ୪ ଭକ୍ତ ନିବାସର ଆତିଥେୟତା ଢାଞ୍ଚା ବଦଳିବ । ଘରୋଇ ହୋଟେଲ୍, ଗେଷ୍ଟହାଉସ୍ ଓ ଲଜିଂ ସହିତ ପ୍ରତିଯୋଗିତା କରିବା ଲାଗି କେତେକ ପରିବର୍ତ୍ତନ ଆଣିବା ଲାଗି ନିଷ୍ପତ୍ତି ନେଇଛି ଶ୍ରୀଜଗନ୍ନାଥ ମନ୍ଦିର ପ୍ରଶାସନ(ଏସ୍ଜେଟିଏ) । ଏହିକ୍ରମରେ ପ୍ରତ୍ୟେକ ଭକ୍ତନିବାସର ପ୍ରକୋଷ୍ଠରେ ଲାଗିବ ସ୍ମାର୍ଟ ଟିଭି । ଏଥିପାଇଁ ଗତ କିଛି ଦିନ ତଳେ ଶ୍ରୀଜଗନ୍ନାଥ ମନ୍ଦିର ପ୍ରଶାସନ(ଏସ୍ଜେଟିଏ)ର ଅର୍ଥ ସବ୍ କମିଟି ବୈଠକରେ ନିଷ୍ପତ୍ତି ନିଆଯାଇଥିଲା । ଏନେଇ ଆହ୍ୱାନ କରାଯାଇଥିବା ଟେଣ୍ଡର ପ୍ରକ୍ରିୟା ଚୂଡ଼ାନ୍ତ ହୋଇଛି । ୪ ଭକ୍ତ ନିବାସରେ ଥିବା ମୋଟ ୩୬୪ରୁ ୩୦୦ ରୁମ୍ରେ ଏସବୁ ଟିଭି ଲାଗିବ ବୋଲି ଜଣାପଡ଼ିଛି । ଆସନ୍ତା ଦଶହରା ପୂର୍ବରୁ ଏସବୁ ଟିଭି ଲଗାଯିବା କାର୍ଯ୍ୟ ଶେଷ ହୋଇଯିବ ବୋଲି ସୂଚନା ଦେଇଛନ୍ତି ଏସ୍ଜେଟିଏ ଓଏସ୍ଡି(ପ୍ରଶାସନ) ଅଜୟ କୁମାର ଜେନା । ଭକ୍ତ ଓ ପର୍ଯ୍ୟଟକମାନଙ୍କୁ ରୁମ୍ରେ ଟିଭିର ସୁବିଧା ପ୍ରଦାନ କରାଯିବା ପରେ ରୁମର ଭଡ଼ା ବୃଦ୍ଧି କରାଯିବା ନେଇ ପରିଚାଳନା କମିଟି ସଦସ୍ୟମାନେ ମତ ଦେଇଛନ୍ତି । ଗତ ୫ ବର୍ଷ ହେବ ଏସ୍ଜେଟିଏ ଅଧୀନରେ ଥିବା ଭକ୍ତ ନିବାସଗୁଡ଼ିକର ଭଡ଼ା ବୃଦ୍ଧି ହୋଇନାହିଁ । ରୁମ୍ଗୁଡ଼ିକର ଭଡ଼ାରେ ୧୦ରୁ ୧୫ ପ୍ରତିଶତ ବୃଦ୍ଧି କରିବା ନେଇ ଆସନ୍ତା ପରିଚାଳନା କମିଟି ବୈଠକରେ ପ୍ରସ୍ତାବ ଆସିବ ବୋଲି ଶ୍ରୀ ଜେନା କହିଛନ୍ତି । ଭକ୍ତ ନିବାସଗୁଡ଼ିକର ପ୍ରକୋଷ୍ଠରେ ଟିଭି ଲଗାଯିବା ନେଇ ଗତ ମାସରେ ଡକା ଯାଇଥିବା ଟେଣ୍ଡର ପ୍ରକ୍ରିୟାରେ ୭ ଜଣ ଅଂଶଗ୍ରହଣ କରିଥିଲେ । ସେମାନଙ୍କ ମଧ୍ୟରୁ ୩ ଜଣ ଟେଣ୍ଡର ଆବେଦନକାରୀଙ୍କୁ ମନୋନିତ କରାଯାଇଥିଲା । ୩୨ ଇଞ୍ଚ ସ୍ମାର୍ଟ ଟିଭି ଲଗାଯିବା ଲାଗି ସବୁଠାରୁ କମ୍ ମୂଲ୍ୟ ପ୍ରଦାନ କରିଥିବା ଆବେଦନକାରୀଙ୍କୁ ଏହା ପ୍ରଦାନ କରାଯାଇଛି । ପ୍ରତ୍ୟେକ ଟିଭିର ମୂଲ୍ୟ ପ୍ରାୟ ୧୩,୦୦୦ ଟଙ୍କା ପାଖାପାଖି ହେବ ବୋଲି ଆକଳନ କରାଯାଉଛି । ଏଥିପାଇଁ ପ୍ରାୟ ୪୦ ଲକ୍ଷ ଟଙ୍କା ବ୍ୟୟ ଅଟକଳ କରାଯାଇଛି । ଘରୋଇ ହୋଟେଲ୍ ଏବଂ ଗେଷ୍ଟହାଉସ୍ଗୁଡ଼ିକରେ ମିଳୁଥିବା ସୁବିଧା ସହିତ ତାଳଦେଇ ଭକ୍ତ ନିବାସରେ ଟିଭି ଲଗାଯିବା ଲାଗି ନିଷ୍ପତ୍ତି ହୋଇଥିଲା । ତେବେ ଏହି ବାବଦରେ ଏସ୍ଜେଟିଏ ୪୦ ଲକ୍ଷ ଟଙ୍କା ବ୍ୟୟ କରିବା ପରେ ପ୍ରକୋଷ୍ଠଗୁଡ଼ିକର ଭଡ଼ା ବୃଦ୍ଧି କରିବା ଯାଥାର୍ଥ ବୋଲି ଏସ୍ଜେଟିଏ ପକ୍ଷରୁ କୁହାଯାଇଛି । କେତେକ ଭକ୍ତ ନିବାସରେ ଲାଗିଥିବା ଟିଭିକୁ ନୀଳାଚଳ ଭକ୍ତ ନିବାସକୁ ସ୍ଥାନାନ୍ତର କରାଯିବ । ପୁରୁଷୋତ୍ତମ, ଶ୍ରୀଗୁଣ୍ଡିଚା ଓ ନୀଳାଦ୍ରି ଭକ୍ତନିବାସରେ ଏହି ନୂଆ ଟିଭିଗୁଡ଼ିକ ଲଗାଯିବ । ସେହିପରି ଡିଟିଏଚ୍ ସଂଯୋଗ ମଧ୍ୟ ପ୍ରଦାନ କରାଯିବ । ସର୍ବନିମ୍ନ ମାସିକ ୨୩୫ ଟଙ୍କାର ଦେୟ ବାବଦରେ ଟାଟାପ୍ଲେ ନେବ । ଭକ୍ତ ନିବାସଗୁଡ଼ିକରେ ବର୍ଷତମାମ ପ୍ରାୟତଃ ୫୦ରୁ ୬୦ ପ୍ରତିଶତ ପ୍ରକୋଷ୍ଠ ବୁକିଂ ରହିଥାଏ । ତେଣୁ ସେହି ହାରରେ ଡିଟିଏଚ୍ କମ୍ପାନୀକୁ ମଧ୍ୟ ଦେୟ ପ୍ରଦାନ କରାଯିବ ବୋଲି ଜଣାପଡ଼ିଛି । ବର୍ଷ ତମାମ ଭକ୍ତ ନିବାସଗୁଡ଼ିକରେ କିଭଳି ବୁକିଂ ହେବ ସେଥିପାଇଁ ଅନ୍ଲାଇନ୍ରେ ପର୍ଯ୍ୟଟକମାନଙ୍କୁ ବୁକିଂ ସୁବିଧା ପ୍ରଦାନ କରିବା ଲାଗି ମେକ୍ ମାଇଁ ଟ୍ରିପ୍ ସହିତ ପ୍ରାରମ୍ଭିକ ପର୍ଯ୍ୟାୟରେ କଥାବାର୍ତ୍ତା ଆରମ୍ଭ ହୋଇଛି । ଖୁବ୍ଶୀଘ୍ର ଏହି ବୁଝାମଣା ହେବ । ଫଳରେ ରୁମ୍ ବୁକିଂ ପରିମାଣ ବୃଦ୍ଧି ପାଇବ ବୋଲି ଆଶା କରାଯାଉଛି । ରଥଯାତ୍ରା ସମୟକୁ ବାଦ୍ ଦେଲେ ଅନ୍ୟ ସମୟରେ କେବଳ ୧୦ ପ୍ରତିଶତ ରୁମ୍ ବୁକିଂ ଘରୋଇ ଅନ୍ଲାଇନ୍ ବୁକିଂ ସଂସ୍ଥାକୁ ଦିଆଯିବ ବୋଲି ଶ୍ରୀ ଜେନା କହିଛନ୍ତି । ଘରୋଇ ହୋଟେଲ୍ ଓ ଲଜ୍ ବା ଗେଷ୍ଟହାଉସ୍ ଭଳି ଭକ୍ତ ନିବାସର କର୍ମଚାରୀଙ୍କୁ ଆତିଥେୟତା ନେଇ ପ୍ରଶିକ୍ଷଣ ପ୍ରଦାନ କରାଯିବ । ଏଥିପାଇଁ କେତେକ ଅନୁଷ୍ଠାନ ସହିତ କଥାବାର୍ତ୍ତା ଆରମ୍ଭ ହୋଇଛି । ଫଳରେ ଭକ୍ତ ନିବାସର କର୍ମଚାରୀଙ୍କ ଦକ୍ଷତା ବୃଦ୍ଧି ପାଇବ । ସେହିପରି ପ୍ରିମିୟମ ବର୍ଗର ଭକ୍ତ ଓ ଶ୍ରଦ୍ଧାଳୁଙ୍କ ପାଇଁ ସମୁଦ୍ରକୂଳରେ ଭକ୍ତ ନିବାସ ନିର୍ମାଣ କରାଯିବା ଲାଗି ଏସ୍ଜେଟିଏ ଚିନ୍ତା କରୁଛି ବୋଲି ଶ୍ରୀ ଜେନା ସୂଚନା ଦେଇଛନ୍ତି ।
ଅନ୍ତର୍ଜାତୀୟରୁ ଆରମ୍ଭ କରି ଜାତୀୟ ତଥା ରାଜ୍ୟର ୩୧୪ ବ୍ଲକରେ ଘଟୁଥିବା ପ୍ରତିଟି ଘଟଣା ଉପରେ ଓଡିଆନ୍ ନ୍ୟୁଜ ଆପଣଙ୍କୁ ଦେଉଛି ୨୪ ଘଂଟିଆ ଅପଡେଟ | କରୋନାର ସଂକଟ ସମୟରେ ଆମେ ଲୋଡୁଛୁ ଆପଣଙ୍କ ସହଯୋଗ । ଓଡିଆନ୍ ନ୍ୟୁଜ ଡିଜିଟାଲ ମିଡିଆକୁ ଆର୍ଥିକ ସମର୍ଥନ ଜଣାଇ ଆଂଚଳିକ ସାମ୍ବାଦିକତାକୁ ଶକ୍ତିଶାଳୀ କରନ୍ତୁ |